काठमाडौं । नेपालमा बैंक लुटपाटमा संलग्न भइ फरार रहेका भारतीय नागरिक सिरहामा पक्राउ परेका छन् । प्रहरीले बैंक लुटपाट गरी फरार रहेका भारतीय नागरिक आरिफ खान भन्ने आरिफ हुसेनलाई डिएसपी वीरेन्द्रकुमार पासवानको नेतृत्वमा खटिएको टोलीले मंसिर २९ गते पक्राउ गरेको हो ।
उनलाई घाइते अवस्थामा भारतबाट नेपालतर्फ भागेर आइरहेको बेला सिरहाको सिरहा नगरपालिका १७ माडरस्थित नेपाल–भारत दसगजा क्षेत्र नजिकबाट पक्राउ गरेको डिएसपी पासवानले जानकारी दिए ।
आरिफलाई हात, खुट्टा लगायत शरीरका बिभिन्न भागमा चोट लागेर घाइते भएको अवस्थामा पक्राउ गरिएको उनले बताए । प्रहरीकाअनुसार आरिफ २०८० जेठ १६ गते दिउँसै महोत्तरीको महोत्तरी गाउँपालिका २ स्थित एनएमबि बैंकमा ४/५ जनाको हतियारधारी समूहले ३८ लाख रुपैयाँ लुटपाट गरेको घटनामा संलग्न भएको फरार अभियुक्त हुन् ।
त्यस्तै २०७९ फागुनमा सिरहाको कल्याणपुरस्थित ग्लोबल आईएमई बैंक शाखा कार्यालय कल्याणपुरका सहायक लेखापाल वर्ष ४३ का उपेन्द्र साहले मिर्चैया नगरपालिका ६ स्थित रहेको ग्लोबल आईएमई बैंकबाट ९ लाख रुपैयाँ लिएर ज.६.प.८१८५ नम्बरको मोटरसाइकलमा आउँदै गर्दा मिर्चैया नगरपालिका .३ बताहा पुल नजिक ४ जनाको हतियारधारी समूहले लुटपाट गरेर भागेका थिए ।
सो घटनामा पनि आरिफको संलग्नता रहेको प्रहरीको दाबी छ । उनीमाथि भारत विहारको मधुवनी जिल्लामा हातहतियार, लुटपाट लगायत मुद्दा दर्ता रहेको र उनलाई पक्राउ गर्न भारतीय प्रहरीले २५ हजार रुपैयाँ पुरस्कारको घोषणा गरेको थियो ।
