काभ्रेपलाञ्चोक‐अग्रज पत्रकार एवं सामाजिक अभियान्ता नवराज बजगाईले आफ्नो जन्मदिन बिहिबार धुलिखेल–१२ स्थित मानव कल्याण समाजले सञ्चालन गरेको ‘सेवा घर’का असहायहरुसँग मनाउनुभएको छ ।
बिगत वर्षहरूमा जस्तै यो वर्ष पनि आफ्नो जन्म दिन ‘सेवा घर’का ६० भन्दाबढी बृद्धबृद्धा र असहायलाई खाना खुवाएसँगै खाद्यान्न तथा लत्ता कपडा हस्तान्तरण गरेर मनाउनुभएको हो ।
प्रेस चौतारी नेपालका केन्द्रीय सदस्य, काभ्रेका पूर्व अध्यक्ष, पत्रकार महासंघ काभ्रेका पूर्व उपाध्यक्ष, अनलाईन मिडिया सञ्जालका सल्लाहकार, नव क्षितिज साप्ताहिकका प्रकाशक÷प्रधान सम्पादक र राम्रो सन्देश डट कमका प्रधान सम्पादक रहेका बजगाईले आफ्नो जन्मदिन यसरी मनाउनुभएको हो । साथै असार २२ गते धर्मपत्नी तारा भट्टराईको जन्मदिनको अवसर पारी सहयोगका कार्यक्रमलाई जोड्नुभएको हो ।
उहाँले सेवा घरका अभियान्ता सुरेश हुमागाईलाई सरसफाईका सामग्री चामल, आटा, दाल, तेल, नुन, जिरा मसला, चिनी, बेसार, चियापती, गेडागुडी, चिउरा, मस्यौरा, साबुन, डेटोल, मञ्जन, बस, फिनेल, सरफ, फलफूल, बिस्कुटसहित खाद्यान्न, फलफुल र लत्ता कपडा हस्तान्तरण गर्नुभयो ।
सामग्री हस्तान्तरण गर्दै पत्रकार बजगाईले सेवा घर शूरु भएदेखि नै यहि आएर सक्दो सहयोग गर्ने गरेको बताउनुभयो । देखाउन भन्दापनि समाजलाई सु–संस्कृत सिकाउन यसो गरेको भन्दै आँफुले शुरु गरेपछि देखेर, सुनेर र सिकेर धेरैले जन्मदिन सेवा घरमा वा अरु कुनै सामाजिक काम गरेर मनाउन थालेको भन्दै खुशी व्यक्त गर्नुभयो ।
कार्यक्रममा धुलिखेल–१२ का वडा अध्यक्ष मोहन प्रसाद लामिछानेले यस्तै सहयोगी भावनाका मान्छेहरुको साथले सेवा केन्द्र चलिरहेको भन्दै नगरपालिका र वडाले पनि सेवा केन्द्रलाई साथ दिएर जग्गा र तयारी भवन उपलब्ध गराएको बताउनुभयो । सामाजिक अभियान्ता राजन अधिकारीले सबैको साथ सहयोगले मानव सम्भव हुने बताउनुभयो ।
कार्यक्रममा समाजसेवीहरु बोदनाथ बजगाई, रुपेश काफ्ले सञ्चारकर्मीहरु अरबिन्द्र गौतम, राज तिमल्सिनालगायतले शुभकामना व्यक्त गर्नुभएको थियो ।
मानव कल्याण समाजले आफ्ना सात वटा सेवा केन्द्र मार्फत असाहायहरुको सेवा गरि रहेको र सबै सेवा केन्द्रमा गरी अहिले करिव ३ सय र धुखिखेल सेवा घरमा ६० जना आश्रीत छन ।
सार्वजनिक स्थलमा कष्टकर जीवन बिताउन बाध्य पिडितहरूको सेवाको लागि ९ वर्षअधि मानव कल्याण समाजको शाखा कार्यालय धुलिखेलमा खुलेको थियो । जहाँ सडक तथा सार्वजनिक स्थलमा कष्टकर जीवन बिताउन बाध्य भएकालाई उद्धार गरी व्यवस्थापन गर्ने गरिएको मानव कल्याण समाजकी अध्यक्ष सुमित्रा चौलागाईले जानकारी गराउनुभयो ।
पत्रकार एवं सामाजिक अभियान्ता बजगाईले गत वर्षका जन्म दिन पनि सोही सेवा घरमा मनाउनुभएको थियो भने विभिन्न अवसरहरूमा पनि यही सेवा घर र काभ्रेमा रहेका बिभिन्न आश्रमहरूमा सहयोग गर्दै आउनुभएको छ ।
