सञ्चार,कला क्षेत्रमा क्षति !
काठमाडौं-वरिष्ठ पत्रकार,गीतकार,लेखक एवं चलचित्र निर्देशक दिपेन्द्र विक्रम दोङको निधन भएको छ ।
ब्रेन ह्युमरेज भई मेडिसिटि अस्पतालमा उपचाररत उहाँको ४३ वर्षको उमेरमा शनिबार अपराह्न निधन भएको हो ।
उहाँको पर्थिब शरीरलाई तामाङ संस्कार अनुसार श्रद्दाञ्जली एवं दाहसंस्कार प्रक्रियाका लागि शनिबार तामाङ गुम्बा बौद्धमा राखिने पारिवारिक स्रोतले जानकारी दिएको छ ।
उहाँका श्रीमति,छोरा र छोरी हुनुहुन्छ ।
दोङको निधन : सञ्चार,कला क्षेत्रमा क्षति
दोङको निधनबाट नेपाली पत्रकारिता,कला साहित्य क्षेत्रले क्षति बेहोरेको छ ।
चलचित्र निर्देशक,साहित्यकार एवं नेपाल टेलिभिजनका महाप्रबन्धक फूलमान वलले दोङको निधनप्रति दुख व्यक्त गर्दै भन्नुभयो-
“पत्याउनै सकिरहेको छैन,अत्यन्त मर्माहत छु । सन्चारकर्म, फिल्मकर्म र साहित्यकर्ममा तपाईं सदैव जिवित रहनु हुनेछ । आङा चाँदनी मोक्तान र परिवारजनप्रती गहिरो समवेदना !!”
तामाङ चलचित्र संघका पूर्व अध्यक्ष,निर्देशक एवं दोङका सहकर्मी जेनिश लामाले आफू अत्यन्त मर्माहत भएको बताउनुभएको छ ।
दोङले तामाङ गीत साहित्य र संचार जगतमा ठूलो क्षति हुन गएको उल्लेख गर्नुभएको छ- “तामाङ कलाकार संघका संस्थापक सचिव, वरिष्ठ गितकार, लेखक, तामाङ चलचित्र निर्देशक,पत्रकार दोङलाई बचाउन सकिएन । तामाङ गीत साहित्य र संचार जगतमा ठूलो क्षति हुन गएकोछ । उहाँको निधन प्रति गहिरो दुःख ब्यक्त गर्दछु र परिवार जनमा समवेदना प्रकट गर्दछु ।”
त्यस्तै नेपाल आदिवासी जनजाति पत्रकार संघका वरिष्ठ उपाध्यक्ष अमरध्वज लामाले पनि सामाजिक सञ्जालमार्फत दोङको योगदानको सम्झना गर्नुभएको छ ।
“तामाङ चलचित्रले आजको उचाइ पाउनुमा निर्माता/ निर्देशकको रूपमा तिम्रो योगदान अविस्मरणीय रहनेछ । पछिल्लो समय पत्रकारिताको व्यावसायिक धारमा तिम्रो उपस्थितिप्रति हामीले गर्व गर्यौं । तर अल्पायुमै धर्ती छाडेर गयौ । बुद्ध लोकमा बास होस् Deependra । भावपूर्ण श्रद्धञ्जली ।”
काभ्रेको तेमालमा जन्मेर झण्डै ३ दशकदेखि राजधानी कर्म क्षेत्र बनाएका दोङ पछिल्लो समय जनता टेलिभिजनको सम्पादक लिडर हुदै मध्यान्न दैनिकको सिइओको रुपमा कार्यरत हुनुहुन्थ्यो ।
यसअघि टाइम्स एफएम,रेडियो जनताका स्टेशन मेनेजरको रुपमा काम गरेका उहाँका सञ्चारका साथै चलचित्र निर्देशन,गीत साहित्य सिर्जनामा उत्तिकै सक्रियता थियो ।
उहाँका “चु ग्यालम खलाङ निला”,”झेलि लाजि जिन्दगीसे” लगायत दर्जनौं गीतहरु कालजयी छन् ।
२०५७ सालमा निर्माण गरिएको दोस्रो तामाङ चलचित्र “मयुङ बुरिङ” का निर्देशक दोङले पछिल्लो दशक जेनिश लामासँगको सहकार्यमा दुबै जनाको लेखन निर्देशन रहेको चलचित्र “नालिस” अन्तराष्ट्रिय आदिवासी चलचित्र महोत्सवमा पुरस्कृत भएको थियो भने गीति नाटक “जेसुम” पनि तामाङ साहित्यमा महत्वपूर्ण मानिन्छ ।
दोङ नेपाली पत्रकारहरूको अन्तर्राष्ट्रिय सञ्जाल (इन्जा) को एसियाका महासचिव,नेपाल तामाङ कलाकार संघका संस्थापक सचिव लगायत विभिन्न संघसंस्थामा आबद्व हुनुहुन्थ्यो ।
