बनेपा–काभ्रेको बनेपामा आन्तरिक तथा बाह्य पर्यटकको आगमन बढाउने र स्थानीय लायकु दरबारको व्यवस्थित रूपमा सदुपयोग गर्न सहयोग गर्ने उद्देश्यले पहिलो पटक ‘बनेपा म्युजिक फेस्टिभल’ हुने भएको छ ।
मञ्जुश्री फाउण्डेशनको आयोजनामा आगामी भदौ १८ गते स्थानीय लायकुमा हुने म्युजिक फेस्टिभलमा स्थानीय म्युजिकल ब्याण्डसँगै राष्ट्रियस्तरका म्युजिकल ब्याण्डहरूको प्रस्तुती रहने छन् ।
फर्मस कर्पोरेशनको सहयोगमा हुने उक्त फेस्टिभलमा ‘द एड्ज ब्याण्ड’,‘द अल्केमिस्ट’,‘ए.एस.एम’ र ‘फन्क फु’ लगायतका म्युजिकल ब्याण्डको प्रस्तुती रहनेछ ।
स्थानीय क्षेत्रमा कार्यरत युवाहरूलाई उर्जा भर्न समेत सहयोग पुग्ने अपेक्षा लिएर गर्न लागिएको फेस्टिभलका लागि सहभागी हुन इच्छुकले टिकेट संसारबाट आफ्नो टिकेट बुकिङ्ग गर्न सक्ने आयोजकले बताएको छ ।
आयोजकका अनुसार फेस्टिभलका लागि अतिथि,कलाकार लगायतलाई निमन्त्रणा,स्थानको व्यवस्थापन लगायतका तयारी लगभग पुरा भएको प्रचार प्रसार तथा सञ्चार व्यवस्थापक रविन श्रेष्ठले जानकारी दिनुभयो ।
आगामी भदौ १८ गते शनिवार दिउँसो १ बजेबाट सुरु हुने फेस्टिभलमा करीब २ हजार दर्शक श्रोताहरू सहभागी रहने अपेक्षा आयोजकले लिएको छ ।
