- नमोबुद्ध संवाददाता :
काठमाडौँ–बेलायतका स्रष्टामाझ निकै महत्वपूर्ण र लोकप्रिय मानिएको नियमित सिर्जना वाचन कार्यक्रम ‘अभिव्यक्ति’को १२औँ शृङ्खलामा कवि तथा गीतकार जानु काम्बाङ लिम्बू अभिव्यक्त हुनुहुने भएको छ ।
नेपाली प्रतिभा प्रतिष्ठान, बेलायतले प्रत्येक वर्ष आयोजना गर्दै आएको ‘अभिव्यक्ति’को यो पटकको १२औँ शृङ्खलामा कवि तथा गीतकार लिम्बूलाई निम्त्याउने निर्णय भएको प्रतिष्ठानकी अध्यक्ष दीपा लिम्बू राईले बताउनुभयो ।
कार्यक्रम आगामी सेप्टेम्बर १४ का दिन बेलायतको हाइवेकम, मिडल्याण्डमा आयोजना गरिने वेहोरा सहितको जानकारी प्रतिष्ठानले एक प्रेस विज्ञप्तिमार्फत दिइसकेको उहाँले स्पष्ट पार्नुभयो ।
ताप्लेजुङ स्थायी घर भएकी कवि तथा गीतकार लिम्बू बेलायतमा साधनारत सक्रिय स्रष्टा हुनुहुन्छ । गीत, कविता, कथा, नियात्रा, मुक्तक र गजल विधामा सशक्तरुपमा कलम चलाउँदै आउनुभएका उहाँको ‘शिविरमा ईश्वर’ कविताकृति, ‘अनुभव’ र ‘जानु’ गीति एल्बम र ‘नउघ्रेको जून’ कथासङ्ग्रह प्रकाशित छन् ।
उहाँका गीत, नियात्रा र उपन्यास कृति प्रकाशोन्मुख छन् । बाल्यकालदेखि नै साहित्यमा रूचि राख्ने लिम्बूका दर्जनौँ सिर्जनाहरू नेपाल,बेलायत लगायतका देशबाट निस्किने विभिन्न पत्रपत्रिकामा प्रकाशित हुँदैआएका छन् । उहाँका दर्जनौँ गीत चर्चित छन् ।
अनेकन सामाजिक सङ्घसंस्थामा आवद्ध उहाँ बेलायतमा पत्रकारिता समेत गर्नुहुन्छ ।
प्रतिष्ठानको यसअघिका ‘अभिव्यक्ति शृङ्खला’हरुमा चोक गुरूङ, दयाकृष्ण राई, टंक वनेम, किशोर गुरूङ, अञ्जु अञ्जली, नोर्देन तेन्जिङ भुटिया, शशी थापा सुब्बा, रक्ष राई, निर्मला परिवेश राई, डा. रूपक श्रेष्ठ र गणेश राई अभिव्यक्त भईसक्नुभएको नेपाली प्रतिभा प्रतिष्ठान, बेलायतका नेपाल प्रतिनिधि एवम् प्राज्ञ शशी लुमुम्बूले जानकारी दिनुभयो ।
