- नमोबुद्ध संवाददाता
रत्ननगर, चितवन, ६ मंसिर ः जनवादी गायक खुसीराम पाख्रिनको आज बौद्ध परम्पराअनुसार पश्चिम चितवन मंगलपुरस्थित ज्ञानेश्वरमा अत्येष्टि गरिएको छ ।
उहाँको पार्थिव शरीरलाई छोरा बाबुरामले दागबत्ती दिनुभएको थियो । जलाएर अत्येष्टि गरी अस्तु ल्याइएको जानकारी दिँदै उहाँका ज्वाई प्रताप गुरुङले तामाङ जातिको परम्पराअनुसार यही मंसिर १६ र १७ गते चोख्याउने बताउनुभयो ।
नेकपा (माओवादी केन्द्र) का केन्द्रीय सल्लाहकार पाख्रिनको ६५ वर्षको उमेरमा मंगलबार हृदयाघात भई मृत्यु भएको थियो । संयुक्त वाम गठबन्धनद्वारा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’का छोरा प्रकाशको श्रद्धाञ्जलि सभामा मंगलबार गीत गाएपछि अस्वस्थ हुनुभएका पाख्रिनको केही घण्टामै उपचारको क्रममा मृत्यु भएको थियो ।
पाख्रिनको शव आज बिहान अन्तिम श्रद्धाञ्जलिका लागि भरतपुरस्थित माओवादी केन्द्रको पार्टी कार्यालयमा राखिएको थियो । सो क्रममा माओवादी केन्द्रका अध्यक्ष दाहाल, नेकपा (एमाले)का अध्यक्ष केपी शर्मा ओली, नेता रामबहादुर थापालगायतका नेताले अन्तिम श्रद्धाञ्जलि दिनुभएको थियो ।
