रोशी—काभ्रेपलाञ्चोकको रोशी गाउँपालिकाका नागरिकले अब आफ्नै गाउँपालिकाबाट व्यक्तिगत तथा व्यावसायिक स्थायी लेखा नम्बर (प्यान) सेवा लिन पाउने भएका छन् ।
रोशी गाउँपालिका र आन्तरिक राजस्व कार्यालय धुलिखेलबिच बिहीबार अब गाउँपालिकाबाटै व्यक्तिगत तथा व्यावसायिक प्यान जारी गर्ने गरी द्विपक्षीय समझदारी भएको गाउँपालिकाका अध्यक्ष दिनेश लामाले जानकारी दिनुभयो ।
अध्यक्ष लामाका अनुसार साबिकमा करदाता सेवा कार्यालयहरूबाट प्रदान भइरहेका सेवाहरू पालिकाबाट दिने नेपाल सरकारको २०८२ कार्तिक १७ को निर्णयबमोजिम द्धिपक्षीय समझदारी भएको हो ।
आफ्नो क्षेत्रभित्र बसोबास गर्ने व्यक्ति तथा व्यवसायीहरूलाई व्यक्तिगत तथा व्यवसायी स्थायी लेखा नम्बर जारी गर्ने सम्झौतामा उल्लेख छ ।
सम्झौता अनुसार मूल्य अभिवृद्धि कर (भ्याट)मा दर्ताका लागि भने आन्तरिक राजस्व कार्यालय, धुलिखेलमा सिफारिस गर्ने र दर्ता प्रमाणपत्र उपलब्ध गरिनेछ ।
सेवा सञ्चालनका लागि आन्तरिक राजस्व विभागले सञ्चालन गरेको इन्टिग्रेटेड ट्याक्स सिस्टम प्रयोग गरिनेछ । यसका लागि आन्तरिक राजस्व कार्यालयले गाउँपालिकाका कर्मचारीलाई आवश्यक तालिम, प्रणाली सञ्चालनका लागि युजर आइडी तथा पासवर्ड र प्राविधिक सहजीकरण उपलब्ध गराउने, गाउँपालिकाले आवश्यक जनशक्ति तथा भौतिक स्रोतसाधनको व्यवस्थापन गर्ने, सेवाग्राहीलाई करसम्बन्धी शिक्षा प्रदान गर्ने र सेवा प्रवाहका लागि एकजना कर्मचारीलाई सम्पर्क व्यक्ति (फोकल पर्सन) तोक्ने आन्तरिक राजस्व कार्यालय धुलिखेलका प्रमुख कर अधिकृत अनमोलकुमार दाहाल र रोशी गाउँपालिकाका तर्फबाट निमित्त प्रमुख प्रशासकीय अधिकृत ठाकुरप्रसाद दाहालद्धारा हस्ताक्षरित सम्झौतामा उल्लेख छ ।
यो सेवा लिन रोशीका नागरिकले अतिरिक्त शुल्क तिर्नु पर्ने छैन । स्थानीय तहबाट प्रदान गरिने सेवाबापत सेवाग्राहीले संघीय राजस्वमा दाखिला गर्नुपर्ने कर तथा शुल्कबाहेक अन्य कुनै सेवा शुल्क वा दस्तुर तिर्नुनपर्ने गरी यो सेवा गाउँपालिकाबाट नै प्रदान गर्ने गाउँपालिकाका अध्यक्ष लामाले स्पष्ट पार्नुयो ।
गाउँपालिका र कर कार्यालयबिच भएको सम्झौता कार्यन्वयनमा आएपछि रोशीका नागरिकले आफ्नो व्यक्तिगत तथा व्यवसायिक स्थायी लेखा नम्बर(पान) नम्बर एवं प्रमाणपत्र लिन सदरमुकाम धाउन पर्ने छैनन् ।














