काठमाडौं । नेकपा एमालेका सांसद सूर्य थापाले मिडिया व्यवस्थापनमा ध्यानदिने बेला भएको बताएका छन् ।
सोमबारको प्रतिनिधिसभा बैठकमा सांसद थापाले आइतबारको संसद बैठकबाट बाहिरिने क्रममा प्रधानमन्त्रीलाई ‘तपाईं हिटलर हो?’ भन्दै प्रश्न सोधिएकोप्रति आपत्ति जनाएका हुन् ।
उनले यसबाट मिडिया व्यवस्थापन गर्नुपर्ने आवश्यकता देखिएको बताए । उनले प्रश्न गरे, ‘नेपालको संविधानले बनाएको व्यक्ति हिटलर हुन्छ? संसद सचिवालयको अनुमति लिएर आएका पत्रकारहरुले संविधानभित्र रहेर प्रश्न गर्नुपर्छ कि पर्दैन ?’
थापाले संसदमा प्रवेश गर्ने संञ्चारकर्मीले कानुनको पालना नगरेको आरोप लगाए । त्यस्तै थापाले आइतबार संसदमा प्रधानमन्त्रीसँगको प्रश्नोत्तरका क्रममा सांसद प्रभु साहले प्रधानमन्त्रीलाई सोधेको प्रश्नप्रति पनि आपत्ति जनाए ।
