काठमाडौं-गायिका शशी किरातीले नयाँ सिर्जना ‘हातैको रुमाल’को म्युजिक भिडियोसहित स्रोता दर्शकमाझ ल्याउनुभएको छ ।
‘हातैमा रुमाल’ पूर्वेली लोकलयमा आधारित गीत हो । यस युगल गीतमा गीतकार तथा गायक जीवन मुकारुङले शशीलाई साथ दिनुभएको छ ।
गीतको भिडियो अफिसियल युटुब च्यानल ‘शशी किराती’मार्फत् सार्वजनिक भएको हो । गीतमा शब्द तथा सङ्गीत जीवन मुकारुङको रहेको छ भने एरेन्ज पदमरजन मगरले गर्नुभएको छ । रेकर्डिङ, मिक्सिङ र मास्टरिङ सेवा रेकर्डिङ स्टुडियोमा गरिएको हो । भिडियोलाई योगेन मुकारुङले खिचेका हुन् भने जीवन मुकारुङले सम्पादन गर्नुभएको हो ।
संखुवासभा जिल्लाको सिलिचोङ गाउँपालिका,माङ्तेवाकी गायिका शशी मोफसलमै रहेर विगत दुई वर्षदेखि नेपाली गीत–सङ्गीतका क्षेत्रमा निरन्तर सक्रिय हुनुहुन्छ ।
छोटै अवधिमा उहाँका दुई दर्जनभन्दा बढी गीतहरू रेकर्ड भएका छन् ।
