मुटुरोगी बसन्तलाई साईप्रसबाट प्राप्त आर्थिक सहयोग हस्तान्तरण

नमोबुद्ध संवाददाता :

काठमाडौं–काभ्रेको रोशी गाउँपालिका वडा नम्बर ९ मंगलटार पनान्चेका मुटु रोगी बसन्त तामाङले उपचारका लागि साईप्रसका प्रवासी नेपालीहरुबाट आर्थिक सहयोग प्राप्त गर्नुभएको छ ।

काभ्रे सेवा समाज साईप्रसका उपाध्यक्ष साहारा लोप्चन तामाङको नेतृत्वमा संकलित रु ४४,४०० नगद सहयोग आईतबार बौद्धमा स्वयम् विरामीकै हातमा हस्तान्तरण गरिएको छ ।

साईप्रसबाट प्राप्त यो नगद नाम्सादिम छोरङान नेपालका संरक्षक कुमार थोकर तामाङ,नाम्सादिमकै अध्यक्ष हिरामान बल तामाङ र सामाजिक अभियन्ता बबिता योन्जनले संयुक्त रुपमा विरामीको हातमा हस्तान्तरण गर्नुभएको हो ।

सहि प्रयोजनमा खर्च गरी थप स्वास्थ्य लाभको कामना गर्दै प्रवासी नेपालीहरुबाट संकलित सहयोग रकम प्रत्यक्ष रुपमा विरामीलाईनै हस्तान्तरण गरिएको नाम्सादिमका अध्यक्ष तामाङले स्पष्ट पार्नुभयो ।

सानै उमेरमा मुटुको समस्याले गर्दा मेन भल्भनै फेरिएका बसन्तको मुटुमा जोड्ने रगतको नली साँघुरिएर थप समस्या देखिएकोमा त्यसको अप्रेसन गर्न आर्थिक अभाव झेल्दै आएको अवस्थामा उहाँले यो सहयोग प्राप्त गर्नुभयो ।

यो रकम काभ्रे सेवा समाज साईप्रस परिवारका साथै त्यहाँ क्रियाशिल अन्य केहि सहयोगी संस्था तथा व्यक्तिहरुबाट संकलन भएको समाजका उपाध्यक्ष लोप्चनले जानकारी दिनुभयो ।

साथै काभ्रे सेवा समाज साईप्रसले बसन्तको उपचारका लागि लाखौं रकम आवश्यक पर्ने भएकोले थप आर्थिक सहयोगको अपिल पनि गरेको छ ।

समाजले भनेको छ –“सेवा नै धर्म हो र सहयोग सानो होस् या ठूलो,पिडितको लागि त्यो अति महत्वपूर्ण हुन्छ ।”