अब निर्माण व्यावसायको सिण्डिकेट तोडिने प्रचण्डको दावी

नमोबुद्ध संवाददाता,,,

यातायात क्षेत्रको एकाधिकार (सिण्डीकेट) तोडेर प्रसंशा कमाएको सरकारका दल नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले निर्माण क्षेत्रमा रहेको एकाधिकार (सिण्डीकेट) पनि तोडिने दावी गर्नुभएको छ ।

काम ठेक्का लिई अलपत्र पार्ने ठेकेदारहरुको नाम संकलन गरी कारवाही प्रक्रियामा सरकार लागेको बेला प्रचण्डले यस्तो दावी गर्नुभएको हो ।

निर्माण व्यावसायीको प्रतिनिधिमण्डलसँग पेरिसडाँडामा शनिबार भएको छलफलमा अध्यक्ष प्रचण्डले काम रोक्ने तर समयमै काम सम्पन्न नगर्ने समस्या रहेकाले यस्तो समस्या अब हटाउने बताउनुभयो ।

यसमा सानाठुला नभनि निजी क्षेत्रलाई सहजे काम गर्न सकिने वातावरण बनाउन सकिने उहाँको आसय थियो । सरकार नीजिक्षेत्रलाई निरुत्साहित गर्ने पक्षमा नरहेकोले यस मुताविक अघि बढ्ने उल्लेख गर्नुभयो ।

साना निर्माण व्यावसायीले काम नपाउने र ठूला व्यावसायीले काम होल्ड गर्दा विकासका काम रोकिएको उहाँले बताउनुभयो ।

विकास, समृद्धि र सुशासन नै आफ्नो सपना भएको उल्लेख गर्दै उहाँले सवृद्ध नेपाल निर्माणको योजनामा निर्माण व्यवसायको सहयोग अपरिहार्य रहेको बताउनुभयो ।

उहाँले अनावश्यक रुपमा बाहिर के प्रचार गरिन्छ, त्यतातिर विल्कुल ध्यान नदिएको र विकास, समृद्धि, सुशासन नै आफ्नो लक्ष्य भएकाले दृढताका साथ अघि बढ्ने स्पष्ट पार्नुभयो ।