नमोबुद्ध संवाददाता
धुलिखेल,११ जेठ :
नेपालले एक दिवसीय अन्तराष्ट्रिय क्रिकेटको पहिलो शृङखला नेदरल्याण्ड्ससँग खेल्ने भएको छ । एक दिवसीय अन्तराष्ट्रिय मान्यता पाएको नेपालले नेदरल्यान्ड्ससँग उसैको मैदानमा पहिलो एक दिवसीय क्रिकेट खेल्ने तय भएको हो ।
इङ्ल्यान्डको लर्ड्स क्रिकेट मैदानमा जुलाई २९ मा नेपाल, नेदरल्यान्ड्स र मेरिलेबोन क्रिकेट क्लब एमसीसीबीच एकदिने ट्वेन्टी ट्वेन्टी त्रिकोणात्मक शृङखला हुँदैछ ।
शृङखलापछि नेपालले नेदरल्यान्ड्स गएर दुईवटा एक दिवसीय खेल खेल्न लागेको हो । नेपालले अगष्ट १ र ३ तारिखमा नेदरल्यान्ड्ससँग दुई खेल खेल्ने तय भएको हो ।
केही महिनाअघि सम्पन्न विश्वकप छनोट प्रतियोगितामा नेपाल अर्को वर्ष आयोजना हुने विश्व कपका लागि छनोट हुन असफल भए पनि चार वर्षका लागि एक दिवसीय क्रिकेट खेल्ने हैसियत बनाउन सफल भएको थियो ।
