- नमोबुद्ध संवाददाता,,,
काठमाण्डौं,२४ बैशाख :
सरकारसँग एकाधिकार अन्त्य गर्ने सहमति गरेका यातायात व्यवसायीले गाडी दुर्घटना हुँदा घाइते यात्रुको उपचार खर्च नब्यहोर्ने चेतावनी दिएका छन् । सिण्डीकेटबाट घुँडा टेकेका उनीहरु बैंक खाता फुकुवा नभएसम्म दुर्घटनामा घाइते भएका यात्रुहरुको उपचार गर्न नसक्ने भन्दै गैरजिम्मेवार बन्न खोजेका हुन् ।
भौतिक पूर्वाधार तथा यातायात मन्त्रालयमा आयोजित पत्रकार सम्मेलनमा नेपाल यातायात ब्यवसायी राष्ट्रिय महासंघका अध्यक्ष योगेन्द्र कर्माचार्यले यस्तो चेतावनी दिनुभएको हो । आफूहरुको काउन्टर बसपार्कबाट हटाइएकाले सडकबाटै सेवा सुचारु गर्नु पर्ने अवस्था आएको भन्दै उहाँले यसबाट उत्पन्न हुने असहजताका लागि सरकार जिम्मेवार हुने बताउनुभयो ।
व्यवसायीले सरकारले साउनबाट संघ तथा समिति नवीकरण नगर्ने निर्णय गरेकाले यातायात क्षेत्रको सम्पूर्ण जिम्मेवारी पनि सरकारले लिनुपर्ने बताउनुभयो । यातायातमन्त्री रघुबीर महासेठले यातायात क्षेत्र सुधारका लागि बनेको कार्यदलले तत्कालै काम सुरु गरेर दुर्घटना बीमा लगायतका विषयलाई टुंग्याउने बताउनुभयो ।
उहाँले यातायात क्षत्रेमा व्यवसायीले उठाएका भाडा, रुट इजाजत, बसपार्क व्यवस्थापन, ई–टिकेटिङ लगायतका विषयमा एक महिनाभित्र प्रतिवेदन लिएर सरकारले उचित निर्णयहरु लिने बताउनुभयो ।
