- नमोबुद्ध संवाददाता
काठमाडौं– आउँदो चैत ३० गतेलाई रिलिज डेट तोकेको फिल्म ‘लिलिबिली’ को शीर्ष गीत बुधबार सार्वजनिक गरिएको छ । स्कटल्यान्डमा छायांकन गरिएको ‘लिलिबिली लिलिबिली घुम्न जाउँ इन्जिन गाडीमा…’ बोलको गीतमा अभिनेता प्रदीप खडकाले आफ्नी रिसाएकी प्रेमिका जसिता गुरुङलाई फकाइरहेको देख्न सकिन्छ । लन्डन, स्कटल्यान्ड र टर्कीमा छायांकन गरिएको ‘लिलिबिली’ को यो गीतको भिडियोमा भने जसिताले स्कटल्यान्डको माइनस जिरो चिसोमा पातलो कपडा लाएर अभिनय गरेकी छन् । प्रदीप र जसिताको रोचक केमेस्ट्रीलाई सुदीप बरालले कैद गरेका हुन् ।
एसडी योगीको स्वर र संगीत रहेको गीतको शब्द एकतारेले लेखेका छन् भने कविराज गहतराजको कोरियोग्राफी रहेको छ । मिलन चाम्स निर्देशित फिल्ममा प्रदीप र जसितासँगै प्रियंका कार्की, अनुपविक्रम शाही, सविन श्रेष्ठ, मनीष श्रेष्ठ, ध्रुव दत्त, रितेश चाम्सलगायतले पनि अभिनय गरेका छन् । निर्माण टिमले बुधबार फिल्मको शीर्ष गीतको डान्स कम्पिटिसन पनि घोषणा गरेको छ । कम्पिटिसनअन्तर्गत उक्त गीतमा नृत्य गरेको भिडियो आफ्नै युट्युब च्यानलमार्फत अपलोड गर्न सक्ने निर्माता गोविन्द शाहीले जनाए । युट्युबमा सर्वाधिक भ्युज पाउने भिडियोलाई १ लाख रुपैयाँ प्रदान गरिने उनले जनाए ।
