- नमोबुद्ध संवाददाता,
दाप्चा–नमोबुद्ध नगरपालिका वडा नं. १० को वडा कार्यालय भवन निर्माण थालिएको छ । आइतबार नगर प्रमुख टिपी शर्मा तिमल्सिनाले भवन निर्माणको शिलान्यास गरेसँगै भवन निर्माण सुरु भएको हो ।
नमोबुद्ध नगरपालिकाले सबै वडामा सुविधासम्पन्न कार्यालय भवन निर्माणको योजनाअनुसार वडा नं.१० को भवन निर्माण सुरु भएको हो ।
भवन निर्माणका लागि युनिक बिल्डर्स नमोबुद्ध ८ सँग भ्याटबाहेक ४३ लाख २६ हजार ९ सय ७० रुपैयाँमा ठेक्का सम्झौता भएको थियो । आगामी असार मसान्तभित्र कार्यालय भवन निर्माण सम्पन्न हुने वडाअध्यक्ष रामकृष्ण अधिकारीले जानकारी दिनुभयो ।
कार्यालय भवन शिलान्याससँगै नगर प्रमुख तिमल्सिनाले तोकिएको समयमै निर्माण कार्य सम्पन्न गर्न निर्माण व्यवसायीलाई निर्देशन पनि दिनुभयो । वडा कार्यालय भवन निर्माणका लागि नमोबुद्ध १० का सामाजिक व्यक्तित्व रामकृष्ण श्रेष्ठले १० आना जग्गा निःशुल्क प्रदान गर्नुभएको छ ।
नमोबुद्ध नगरपालिकाले सबै वडा कार्यालयको पक्की र सुविधासम्पन्न भवन निर्माणको योजनाअनुसार यो आर्थिक बर्षमा ५ वटा वडा कार्यालय भवनको निर्माण गर्दैछ । यो बर्ष वडा नं.१० सहित वडा नं. २, ७, ८ र ९ को कार्यालय भवन निर्माणका लागि ठेक्का सम्झौता भइसकेको छ । यसअघि निर्माण थालिएका वडा नं.३, ६ र ११ का वडा कार्यालय भवनको निर्माण अन्तिम चरणमा पुगिसकेको छ ।
