काठमाडौं- पेप्सीकोला टाउन प्लानिङस्थित सनसिटी अपार्टमेन्टको १५ औं तलामा बस्ने दुई जनाको पीसीआर परिक्षणमा पनि कोरोना पोजिटिभ देखिएको पुष्टी भएको छ ।
स्वास्थ्य तथा जनसंख्या मन्त्रालयका अनुसार पेप्सीकोला टाउन प्लानिङस्थित सनसिटी अपार्टमेन्टमा लण्डनबाट आई बसोबास गर्ने एकै परीवारका ३ जना कोभिड-१९ को शंकास्पदहरूको मिति २०७७ साल बैशाख १ गते आरडीटी विधिबाट परीक्षण गर्दा दुई जना (५८ बर्षिया पुरुष, ८१ बर्षिया महिला) को पोजेटिभ देखिएकोले पीसीआरबाट थप परिक्षण गर्दा समेत पोजेटिभ रिपोर्ट देखिएको छ भने बाँकी १ जनाको पहिलो परिक्षणमा कोभिड-१९ पोजेटिभ नदेखिएको र उल्लेखित ३ जना व्यक्तिहरू क्वारेन्टाईन टाउन प्लानिंङ स्थित निवासमा बसोबास गर्दै आएको थियो ।
सो परिवार गत चैत ५ गते लण्डनबाट काठमाडौं फर्किएको थियो । उनीहरु बस्दै आएको अपार्टमेन्टलाई सिल गरेर प्रहरीले सुरक्षा ब्यवस्था कडा पारेको छ । प्रहरीले सो अपार्टमेन्टमा बस्ने सबैलाई घर भित्रै रहन आग्रह गरेको छ ।
अहिले एकै परिबारका दुई जनामा पनि कोरोना संक्रमण पुष्टि भएसंगै नेपालमा कोरोना भाइरस संक्रमितको संख्या सोह्र पुगेको छ ।
