म्हारमेनको ‘मी चीम चीम’ आयो युट्युवमा(भिडियोसहित)

नमोबुद्ध संवाददाता

काठमाण्डौं–औपचारिक रुपमा सार्वजनिक हुनुपूर्वनै चर्चा कमाएको तामाङ चलचित्र ‘म्हारमेन’ को गीत ‘मी चीम चीम’ युट्युवमार्फत सार्वजनिक गरिएको छ ।

चलचित्र निर्माण टिमले मंगलबार राजधानीमा पत्रकार,कलाकार सहितलाई भेला गराई औपचारिक रुपमा यो गीत भिडियो सहित सार्वजनिक गरेको हो ।

एभरेष्ट फेसन होमको प्रस्तुती यो भिडियोलाई डम्फु मिडियाको आफिसियल युट्युव च्यानलमार्फत हेर्न सकिने यहि चलचित्रका नायक एवम् तामाङ सुपरस्टार डम्फु मिडिया हाउस प्रालिका सञ्चालक अमिर दोङले जानकारी दिनुभयो ।

नायक दोङले चलचित्र म्हारमेन आफूहरुको सामुहिक प्रयास रहेको उल्लेख गर्नुभयो । उहाँले नायिका रञ्जिता ब्लोनसँगको आफ्नो केमेष्ट्री दर्शकले मन पराउने विश्वास व्यक्त गर्नुभयो । झण्डै आधा दशकपछि फेरि तामाङ चलचित्रमा कम्व्याक भएका नायिका ब्लोनको अभिनयलाई दर्शकले सहर्ष स्वीकार्ने अपेक्षा गरिएको छ ।

‘मी चीम चीम’ बारे जानकारी दिनुहुदै नायिका रञ्जिता ब्लोनले भन्नुभयो–“यसअघिनै अनौपचारिक रुपमा टिकटकमा चर्चा पाईसकेको म्हारमेन चलचित्रको यो गीत अब आम दर्शक स्रोताको मनमनमा पुग्दैछ,यहाँहरुको साथप्रति हामी निकै आभारी छौं ।”

चलचित्र ‘म्हारमेन’ भने छायांकनको अन्तिम चरणमा रहेको उहाँले जानकारी दिनुभयो । उहाँले स्पष्ट पार्नुभयो–“अबको तीन महिनापछि हामी चलचित्रसहित लिएर दर्शकमाझ आउँनेछौं ।”

गायक तथा संगीतकार विशाल काल्तान र गायिका जितु लोप्चनले स्वर दिएको यो गीत विशाल काल्तानकै शब्द रचना तथा संगीतमा तयार भएको हो । भिडियो तथा चलचित्र बिक्रम लामाले छायांकन गर्नुभएको हो ।

‘मी चीम चीम’ भिडियोमा देखिएका अमिर दोङ, रञ्जीता ब्लोन र सुष्मा मोक्ताननै चलचित्रका मुख्य कलाकारहरु हुनुहुन्छ ।

निर्देशक तथा कोरियोग्राफर अजय स्याङतानले चलचित्र भुकम्पपछिको तामाङ बस्तीको अवस्था,त्यसमा शैक्षिक स्थितीका बारेमा रहेको जानकारी दिनुभयो ।

ऋतुराज पाख्रिनको कथा तथा दोर्जे तामाङको पटकथा र संवाद रहेको चलचित्र बिनोद लामा र सुनी लामाले निर्माण गर्नुभएको हो । जसको प्रोडक्सन म्यानेजर कुईसाङ रुम्बा हुनुहुन्छ । चलचित्रमा फुलकुमार बोम्जनको शब्द रचनाका गीत पनि समावेश छन् ।