पुर्व अध्यक्ष त्रयलाई फोनिज काभ्रेको सम्मान

कृतिका घलान

बनेपा–नेपाल आदिवासी जनजाति पत्रकार महाँसंघ(फोनिज) काभ्रेले आफ्ना पुर्व अध्यक्षहरुलाई सम्मान गरेको छ । फोनिज काभ्रेले आईतबार आफ्नो १९ औं स्थापना दिवसको अवसर पारी पुर्व अध्यक्ष त्रयलाई दोसल्ला र सम्मानपत्रद्धारा सम्मान गरेको होे ।

समुदाय र आदीवासी जनजाति पत्रकारहरुको हक हित स्थापित गराउन तत्कालिन आदीवासी जनजाति पत्रकार संघ(अनिज)को जिल्ला शाखा स्थापना गरी आजसम्म निरन्तर योगदान दिने संस्थापक अध्यक्ष दिनेश लामा,पुर्व अध्यक्ष योक बहादुर घिसिङ र उजाड रक्तीम सम्मानित भएका हुन् ।

सम्मान समारोहमा प्रमुख अतिथिको रुपमा आउनुभएका संघिय सांसद गंगाबहादुर दोङ(बमध्वज)ले आदीवासी समुदायको पहिचानका खातिर कलम चलाएका व्यक्तित्वहरु सम्मानित भएकोमा बधाई दिनुहुदै अझै निरन्तर क्रियाशिलताको कामना गर्नुभयो ।

उहाँले पत्रकारहरु समाज निर्माणमा चेतनाको संवाहक भएकोले उनिहरुको योगदानलाई भुल्न नसकिने बताउनुभयो । मुलुक सवृद्धिको दिशातर्फ गएकोले यो अभियानमा पनि उत्तिकै भुमिका खेल्न पत्रकारहरुलाई आग्रह गर्नुभयो ।

समाजलाई सहि दिशा निर्देश गर्ने मुख्य भुमिका पत्रकारहरुको रहने भन्दे उहाँले यसमा पत्रकार दक्षताको आवश्यकता पनि औंल्याउनुभयो । सांसद बमध्वजले पछिल्ला समय जन्मिएका पत्रकारहरुले अध्ययनविना कलम चलाउदा समाजमा नकारात्मक असर पर्ने गरेको उल्लेख गर्दै यसतर्फ सचेत हुन पनि अनुरोध गर्नुभयो ।

पत्रकार महाँसंघका अध्यक्ष मोतिराम तिमल्सीनाले पत्रकार महाँसंघ र फोनिजबिच सहकार्यमा पत्रकारहरुको पेशगात हितका सवालमा काम गर्ने बताउनुभयो । उहाँले वर्तमान सरकारले पत्रकारहरुको पक्षमा राम्रा कदमहरु चालेको भन्दै ति अवसर,सेवा सुविधाको पहँचमा आदीवासी जनजाति पत्रकाहरुलाई विमुख नगराउने प्रतिवद्धता समेत जनाउनुभयो ।

सम्मानित त्रयले आफ्रनै संस्थाबाट सम्मानित हुदा झनै उर्जा मिलेको धारणा राखे । राजनीतिक आन्दोलन सकेपछि अब आज मुलुकले कस्तो बाटो समाउने ? त्यसमा आदीवासी समुदाय र पत्रकारहरुहरुको भुमिका के हुने भन्नेमा स्पष्ट हुन जरुरी रहेको अध्यक्ष त्रयको भनाई छ ।

फोनिज काभ्रेका अध्यक्ष शिशिर दोङले यो पटक स्थापना दिवसको सन्दर्भमा पुर्व अध्यक्षहरुलाई सम्मान गर्न पाउँदा खुसी लागेको बताउनुभयो । उहाँले भन्नुभयो–“उहाँहरु आज पनि हाम्रा अभिभावक हुनुहुन्छ, हिजोको राजनीतिक आन्दोलनदेखी आजको यो परिवर्तनसम्म समुदाय र हामी पत्रकारहरुका लागि खेलेको भुमिकालाई हामीले सम्झेका हौं ।”

अध्यक्ष दोङले अग्रजहरुलाई सम्मान गरी १९ औं स्थापना दिवस मनाएको फोनिज काभ्रेले छिट्टै आदीवासी समुदाय र पत्रकाहरुको हितका लागि पत्रकार महाँसंघ र स्थानिय तहसँग मिलेर विभिन्न कार्यक्रमहरु गर्ने जानकारी दिनुभयो ।